ARREXINIS. Su 2026 si pinnìgat su stréxu. Ma nèmus d’at nau de abarrai innoi!

Su 2026 est giai unu gurrei fadiau, cun sa corona mesu abucada, su manteddu sbisurìu e cun dd’una gana maca de lassai su scètru.
Pùstis ùndixi mesis de rènniu, cumèntzat a mirai su calendàriu cumenti a unu impreau chi abètat sa pintzioni.
Ndi fíat arribau cun sa bussa prena de promissas, de paxi, abudàntzia e sinzillesa.
A bellu a bellu, andenti a innanti, dèpit essi pédriu su follieddu de is nòdas.
At spainau préxiu a istíddius e istròbus a carrùcius.
In política, cumenti a sèmpiri, tótus anti traballau po su beni cumunu.
Ma donniunu teniat una bidea diferenti siat de su beni siat de su cumunu.
Nc’est chini at cambiau pàrri, chini at cambiau parti e chini, po no sballiai, at cambiau féti sa manera de si fai s’arrexioni.
 Su 2026 s’at rigalau unu esércitu de dotoreddus nòus.
Tótus laureaus in s’ateneu de Facebùcu.
Fíntzas cun su clima at fatu de is sùas: basca candu disigiamus su fríscu, àcua a sícias candu apariciamus is fèstas e tèmpus bellu candu fèmus custríntus a abarrai incotius in domu.
E s’intelligéntzia artifitziali? Cussa at fatu passus de giganti.
Imoi si pònit a iscriri, fàit disínnius spantosus,e arrespùndit a dónnia pregunta.
S’ùnica cosa chi no iscít fai, est a cunbinci su basucu candu est sballiendu.
Ma po nai sa beridadi no nci fùnti arrennéscius nimancu duamilla annus de filosofia.